100 manna helgi í Vatnaskógi

Hópnum var smalað í hópmyndatöku á milli atriða

Tvisvar á ári stendur Félag fósturforeldra fyrir fósturfjölskylduhelgum í Vatnaskógi. Helgarnar eru haldnar í þeim tilgangi að styrkja tengsl milli fósturbarna og fósturfjölskyldna, njóta nærandi samveru og skemmta ungum sem öldnum.

Í ár tóku 20 fósturfjölskyldur eða rúmlega 100 manns þátt. Helgin var vitaskuld stútfull af dagskrá, alveg frá því að mætt var á staðinn á föstudegi og fram að brottför á sunnudegi.

Fósturforeldrarnir sem komu hvaðanæva af landinu í Vatnaskóg

Eftir að fósturfjölskyldurnar voru mættar á svæðið, höfðu komið sér fyrir og lokið við að snæða fyrstu máltíðina af fjölmörgum var haldið út í myrkrið í vasaljósagöngu og varðeld þar sem í boði var að grilla sykurpúða. Að því loknu var haldið inn í hlýjuna á kvöldvöku sem starfsfólk Vatnaskógar stýrði. Á laugardagsmorgni kom Blaðrarinn í heimsókn og kenndi fólki að gera bæði blöðrudýr og ýmsar sirkúskúnstir. Nóg var svo af hoppuköstulum og var ákveðið að henda í kandífloss til að gulltryggja að stuðið yrði allsráðandi.

Það er alls óvíst hvor náðu meiri lofthæð, kandíflossarnir eða hoppukastalarnir

Starfsfólk Vatnaskógs hélt svo úti valdagskrá fyrir öll börn og ungmenni svo að fósturforeldrarnir fengju eitt dagskrárbil í næði til að ræða saman um áskoranir og bjargráð í hlutverki fósturforeldra og sækja styrk til hvors annars. Á meðan gátu börnin farið í leikinn varúlf, föndrað eða farið í ærslaleiki í íþróttasal.

• 

• 

• 

Undir lok dags komu síðan Spilavinir með heilan helling af spennandi og skemmtilegum spilum og kepptu ungir og fullorðnir um sigur í allskyns spilum sem reyndu á snerpu, hugvit og athygli.

Family inc. er frábært spil fyrir alla fjölskylduna

Um kvöldið skartaði salurinn í Birkiskála sínu skelfilegasta en þar tók svo við grímuball. Á sunnudegi var helginni lokið með þeim hætti að sigla út á vatn í árabátum en að því loknu bauð Vatnaskógur í heljarinnar pizzaveislu. Það héldu því öll sátt og södd heim á leið. Fósturfjölskylduhelgar í Vatnaskógi er dýrmætur liður í starfi félagsins, í ár var okkur gert kleift að halda helgarnar með styrk frá SOS barnaþorpum, með hluta þess styrk sem félagið fékk í þágu farsældar barna frá mennta- og barnamálaráðuneyti og með styrkfé frá einstaklingum. Það fé nýtti félagið til að greiða þátttökugjöld fósturbarna og fyrir aðkeypta dagskrá fyrir fósturfjölskyldur.